Friday, December 10, 2004

Ana's Story

ANG SUGILANON NI ANA

Gwapa. Puti-on. Igo-igo ang katas-on. Slim. Mao kana ang kasagarang hulagway kang Ana kaniadtong estudyante pa siya sa MPSC. Buutan nga estudyante ug dili andam musupak-supak sa mga balaodnon nga gipatuman sa eskwelahan. Brayt ug, susama sa uban pud nga estudyante, abli ang huna-huna ni Ana sa tanang mga pangutana nga iyang matagbuan ug mahunahunaan.

Kini ang iyang sugilanon ug ang mga sugilanon dili interesante kung walay problema nga angay solbaron. Ang problema ni Ana nagsugod sa dihang gihuslan ang iyang notebook sa Math 10 sa iyang boardmate nga si Beth.

Membro si Beth sa Student Christian Movement of the Philippines o SCMP. Niuban siya sa picket rally didto sa Divisoria aron pagsuporta sa ilang panawagan nga i-us-us ang balayronon sa eskwelahan dili lamang sa Cagayan de Oro City kundili sa tibuuk nasod.

DILI MAKATARUNGANON ANG PADAYUN NGA PAG-UBOS SA BUDGET NGA GIBUBU SA ATONG GOBYERNO DIHA SA EDUKASYON!” Mao kana ang batbat sa usa ka mamumulong nga usa ka maayung estudyante sa Xavier University. Mao kana ang nadunggan ni Ana sa dihang niabot siya sa Divisoria. Iyang giapas si Beth kay aron kuhaon ang iyang notebook kay kinahanglanun niya kini nga kamulo pud ginabasa ni Beth.

Beth! Beth!” Gitawag ni Ana si Beth nga anaa sa tunga-tunga sa tapok sa mga estudyante gikan sa nagkalainlaing eskwelahan sa Cagayan de Oro apil ang XU, MPSC, Liceo, CU, ug COC. Alas-dose y media na sa udto ug grabe kainit ang panahon ubanan pa sa kainit sa mga mulo ug demanda sa mga estudyante ug uban pang kabatan-unan nga gatapoktapok aron sa pagpadayag ug pagrehistro sa ilang tingog dungan sa National Day of Youth and Student Protest.

Ana! Maayu kay nitambong ka. Wala na diay mo klase?” ingun ni Beth diha kang Ana.

Unya pang alas-tres. Klasmeyt baya ta. Hoy, Beth, ako na pud gamit ana akong notebook be. Mag-review pa ra ba ko para sa atong exam unya.” Idungag pa unta ni Ana nga wala siya nalipay sa paghulam ni Beth sa iya notebook ug sa pagpalisudlisud niini kaniya kay diri pa gayud sa tunga-tunga sa rally niya gipakuha. Hunahuna ni Ana “Sus, wala gyud ni maayung makab-ot inyo pagsyagit-syagit diri kay dili lang gihapon mu paminawon ni Gloria.

DAKO KAAYUNG HAGIT SA ATONG MGA KABATAN-UNAN ILABINA KADTONG NAA PAY HIGAYON SA PAG-ESKWELA NGA IPADAYUN ANG ATONG PAGTUUN DILI LAMANG DIHA SULOD SA ATONG TULUNGHAAN,” dungag nga batbat sa estudyanteng mamumulong. “ANG ATONG KATILINGBAN USA KA DAKONG TULUNGHAAN UG ANG KATAWHAN NGA NAG-ILAID SA KALISOD UG PAGPAHIMULOS MAO ANG ATONG GIYA DIHA SA ATONG PAGTUUN.

Mao ba? Abi nako ug nakatuun na ka kagabii. Sige, naa ra o. Nabasa na man pud hinoon nako na sugod ganinang buntag. Makapasar ra man tingali ko,” tubag ni Beth apil ang pagkatawa ug dako. Ningisi si Ana uban sa pagkatawa ni Beth. Bisan naa siya gamay nga kalagot kang Beth, gihunahuna lang gihapon niya nga makapasar unta si Beth.

Problema gyud kang Ana ang pagkaaktibista ni Beth. Suod niya nga higala si Beth ug dili niya gusto nga madaut ang kaugmaon niini.

Para kang Beth, usa ka buutan ug masaligan nga higala si Ana. Dako kaayu iyang pag-admire diha kang Ana dili lang tungod sa padayun niini nga pag-top sa klase kundili tungod sa padayun niini nga pag-ila kaniya isip higala pud. Bisag wala gipakita ni Ana ang iyang negative nga impression sa mga kalihukan nga gisalmotan ni Beth, maklaro kini ni Beth.

Walay problema sa tawo nga walay kasolbaran. Ug sa sugilanon ni Ana, ang kasolbaran diha ra gihapon nag-gikan kaniya. Nagsugod kini dihang nailhan ni Ana si Christian.

Si Christian ang Education Officer sa SCMP-MPSC Chapter. Nag-ila sila sa usa ka educational discussion kabahin sa National Situation. Nitambong si Ana kay interesado siya nga madunggan kung unsa ang pagtan-aw sa maong organisasyon sa kasamtangang kahimtang sa atong nasod.

Ang kahimtang sa atong nasod usa lamang ka kasamtangang hulagway sa nagpadayun nga proseso sa pag-apod-apod sa bahandi sa atong nasod,” ang unang istorya ni Christian. “Adunahan kaayu ang atong nasod sa minerales, tambok nga yuta, ug halapad nga dagat. Pero bisan sa kaadunahan nato sa natural resources, dako kaayu nga pangutana kung ngano grabe nga kalisod ang nahiaguman sa katawhang Pilipino… ” Nagpadayun ang paghatag ni Christian ug input sa maong educational discussion.

Dili lamang mga tubag ug mga pagtulun-an ang nakutlo ni Ana sa nahitabong discussion. Daghang mga importanteng pangutana ang iyang nadunggan nga wala pa niya napangutana kaniadto sa iyang kaugalingon. Hinay-hinay niya nga nasabtan ang mga nahitabo sa iyang palibot. Dako kaayu ang pagpasalamat ni Ana kang Beth sa pag-awhag niini sa pagtambong sa maong discussion…

Pipila na ka bulan ang nilabay human ang maong ang sugilanon. Ubay-ubay na pud nga mga classmates ug kaila niya ang iya natagaan ug orientation sa ilang organisasyon. Si Ana na ang ilang bag-ong education officer. Si Christian ang bag-ong chairperson. Si Beth ang secretary-general.

Nagpadayun pa ang bag-ong sugilanon ni Ana, Christian, Beth ug uban pang kristyanong estudyante nga nakasabot sa tinood nga tahas sa pagkakristyano nga mao ang pagsunod sa mga lakang ni Hesus diha sa pagserbisyo sa katawhang kabus ug gidaugdaug. (END)

No comments: